Magbagtas ra man kami nan an kanhi patunong sa eskuwelahan nan pagbalik namo sa bayay gikan sa eskuwela, kami na mga kabataan sa amô henerasyon; mag-isa ra kami maghimô nan amô homework sanan arang karajaw kaikyat namô himoon an amô mga assignatura kay gusto naman namô magduwâ sa karsada; halos tanan libre namô na oras, amo ra'y hiling namo nan duwâ sa karsada kaibanan an mga higaya, hangtud na humog na nan huyas an amô mga barô; maka-duwa kami nan una nan hide and seek sa madug'yum na mga lugar; kami ra'y maghimo nan amô mga trompo sanan usayhay maghulma kami nan mga lapuk na himoon na cake; manhanap kami nan mga basiyo nan botelya nan soft drinks, limpiyuhan pagkatapos iuli sa tindahan sa kanto para lukaton an deposito na singko sentabos, tapos magpalit dajun nan isa ka soft drink sanan choknut para ibahaw sa mga manghud; nangolekta sab kami nan mga sports card nan una; usahay, maghimô sab kami nan mga duwaan na karton, trak-trak na lata na an ligid, takyub nan medicina na pinuyot sa kilid nan despensaryo; nakapagpatukar sab kami sa amô quadrosonic stereo nan mga vynil album; sus, duro sab matuod an mga litrato namô na nakolekta para sa amô mga album sanan scrap book nan amô mga kaagi; duwâ sab kami nan dama sanan chess sa gymnasium hangtud kamarduyuman; payungon na dajun nan amo mga ginikanan an tv pagka tingay-duyom na pagkatapos nan National Anthem para matuyog na dajun kami; pirme jaon an amô mga ginikanan para kami nila igiya sa eksakto na dayan ss kinabuhi; tuod, nagsi-hagikhikan kami sa ilayum nan haboy na nak-kuyumbot para dili kami hidunggan nila tatay sanan ni nanay sanan para dili kami hibay'an na mga mata pa. Ini an amô henerasyon -- sayang, dili na nakô mahibalik ini na mga kaagi namô, na para dakô, pinaka-matam'is na panahon nan amô mga kinabuhi.
