The Feeding of the Five Thousand

Isaiah 55:1-3
Psalm 145
Romans 8:35, 37-39

Matthew 14:13-21

May mga situwasyon na madali ra kita makadesidir na ato ipasa sa iban na tawo an mga trabaho na unta para dato.

Amo sab an nahitabo dinhi sa Ebanghelyo kuman, imbes na responsibildad unta nan mga disipulo na pakan-on an mga tawo, aja hinuon nila pauli’a unta an mga tawo para malibre sila sa ila trabaho.

Sa kada situwasyon na kinahanglan nan solusyon, marajaw seguro na eksaminon sab nato an ato kaugalingon kon uno’y ato mahimo para makatabang sab kita sa pagsulbad an problema para mahimo kita na parte nan solusyon, dili kon parte kita nan problema.

----

The Death of John the Baptist

Leviticus 25:1, 8-17
Psalm 67

Matthew 14:1-12

An piging sanan paglipay-lipay nila Herod, Herodias, Salome sanan nan mga bisita nagresulta nan kamatajon ni John the Baptist. Hinsip’gan man tuho si Herod sa ija saad sa bata sanan sa mga bisita na abir kon uno’y pangajuon ni Salome, ija ihatag.

Para kan Herodias, kajuhot an nangibabaw sa ija huna-huna para i-kombesir nija an ija anak na punggotan nan uyo si John.

Kon ad-oy kajuhot nato sa ato kasing-kasing, usahay maka-desidir kita nan mga desisyon na magresulta nan kadaot na dili na nato mabawi bisan sa uno na paagi.

Ugsa na ipangaliya gajud nato permi sa Ginoo na adiser kita mopadangat nan desisyon, Ija kita giyahan para dili magresulta nan kadaot an ato mga desisyon.

---

Martha, the Sister of Lazarus

1 John 4:7-16
Psalm 34

Luke 10:38-42

Insugat dajon sa gawas ni Martha si Jesus para sugin'lan nan pagkamatay nan ija igsoon na si Lazarus. Hugot pa gihapon an pagtuo ni Martha na mabanhaw ra si Lazarus pag-abot nan panahon, pero dili kon mabuhi dajon sija nan jadto na tungora. Waya sija magpalandong na buhion si Lazarus ni Jesus unabes nan jadto na mga gutloa pinaagi sa gahum na Diyos kay Sija man an nagmugna nan tanan kinabuhi.

Kita ‘sab, kinahanglan na ad’oy ato hugot na pagtuo na mabanhaw ra sab kita pag-abot nan panahon nan paghukom, amo na paningkamutan nato, parehas kan Martha na hugot an ija pagtuo sa pagkabanhaw, na andam ‘sab kita moatubang sa ato Maghuhukom, an ato Diyos Ama sa Langit.

---

The Parable of the Dragnet

Exodus 40:16-21, 34-38
Psalm 84

Matthew 13:47-53

Nan bata pa ako, usahay maka-iban ako kaya Mano Mani pag-pamaling sa danaw. Sa baybay nan Kabugaw kami maghuyat kaibanan an iban na mga mangingisda kay an tuyo dila, magbaroto man nadto sa lawud para itabog an baling. Pagkatapos, gujuron na an hataas na pise patunong sa baybay para bitaron an baling.

Pagka-segurado na sila na puwede na sugdan an pagbitad nan baling, uno dos tres na dajon an ila lider para dungan na bitaron an mag-at’bang na pise. Tuod man, pag-abot nan baling sa baybay, puno nan mga isda an hinaboy.

Dinhi, magsugod na pag-pili sila nan mga isda – ila-in an mga pijanga sa iban na klase nan isda, pagkatapos, ilabog pag-balik sa danaw an dili kon pijanga. Amo ini an paagi pag-pamaling nan pijanga sa Habungan.

Sa Ebanghelyo, an mensahe: pag-abot nan panahon, pili-on nan Diyos an mga marajaw kay an mga dautan, ilabog man Nija. Pero Sija ra gajud an mopadangat nan paghukom kon sin-o an Ija pili-on.

---

Parables of the Kingdom

Exodus 34:29-35
Psalm 99

Matthew 13:44-46

Adto’n entrada nan ini na tuig, naglunop sa Habungan kay nosulig man an tubig sa Danaw nan Mainit. Duro na mga Habunganon an ingka-wad’an nan mga kabtangan, bayay, binuhi na hajop sanan kon uno rakan na mga importante na mga butang sa ila mga kinabuhi.

Bilib lamang ako dila kay kon kumustahon sila nan jadto na mga tungura, an ila tubag: “abir kon manga-anod an tanan namo na mga kabtangan, basta kami, mapasalamaton gajud sa Diyos kay buhi ra kami tanan.”

Pinaka-importante gajud an kinabuhi nan tawo ugsa na mangingkamot gajud sija na isalba nija an ija kaugalingon sanan an ija mga mahal sa kinabuhi.

Pero, an hataas pa sa pinaka-importante, an ato Diyos na amo’y nagmugna nan tanan na mga butang sa kalibutan. Amo na kinahanglan, ipakita gajud sanan ipabati nato sa ato Ginoo an ato pagmahal Dija pinaagi sa ato pagkonsiderar Dija na pearl of great price na taglaong sa Ebanghelyo.

---

The Explanation of the Parable of the Weeds

Exodus 33:7-11; 34:5b-9, 28
Psalm 103

Matthew 13:36-43

Pasensiya an pinaka-tema nan Ebanghelyo kuman. Gusto nan Ginoo na sa ato pagdesisyon, dili kon jaon tag-laong na padalus-dalus o kon sa ato pa, dili mag-dayungali. Jao’y pagja sa ato na kinahanglan dili kuno mag-dali kay aja hinoon magka-bali-bali.

Kinahanglan permi hutad an paghimo nato nan desisyon na nakabase sa halayum na deliberasyon. Ugsa na an pagpamati gamit an tinood na talinga na an buot ipasabot na kasing-kasing an basehan nan tanan, amo’y magresulta nan marajaw na luna.

Tagpamatian ba nato an mga pulong nan ato Ginoo?

---

The Request of James and John

2 Corithians 4:7-15
Psalm 126

Matthew 20:20-28

An pagpayangga nan nanay sa ija mga anak, dili gajud mahi-kumpara. Dinhi, gusto maneguro nan nanay nila James sanan John na maka-iban sa himaya na kadtoan ni Jesus. Abir kon uno’y dangatan nan ija mga anak, waya nija huna-huna-a kay positibo man sija na jaon sa marajaw na mga kamot an ija mga anak.

Pero waya nija palandunga na ad-o’y baja mga konsikwensiya na kabajaran kon kaibanan an Ginoo. Puwede kaha mag-antos sila nan parehas nan inantusan ni Jesus?

Ugsa na tagpsidan-an sila ni Jesus na kon gusto nila mahimo na dungganon, kinahanglan mahimo anay sila na mga suluguon.

Andam ba kita na mahimo na suluguon adeser kita makasunod kan Jesus?

---

The Weeds among the Wheat

Exodus 24:3-8
Psalm 50

Matthew 13:24-30

Huyatan lamang nato na motubo an mga sagbot dungan sanan tanum nato na trigo. Mapailubon gajud karajaw ini na agalon sanan waya gajud sija mag-dali na magdesisyon kay waya man dajon sija modesider na bugnuton unabes an mga sagbot kay nahibayo man sija na mahilakip pagka-bugnot sab an trigo na ija tinanom.

An ato Diyos dili kon parehas dato na mopadapat dajon nan desisyon na waya’y deliberasyon o pagtimbang-timbang sa sitwasyon. An suhestiyon nan mga suluguon sanan an ila pangutana kon bugnuton unabes an mga sagbot amo’y pagpakita lamang nan jaon taglaong sa tinagalog na padalus-dalos. An ato Ginoo mohatag nan higayon na base ra sab kon magbag-o o maghinsulsol an mga mayaot sanan makasasaya, dili Sija kon padalus-dalos.

Amo na pangaju-on nato sa Diyos na hatagan kita Nija nan grasya para ad-o’y ato marajaw na disposisyon kada magsagubang kita nan sitwasyon na kinahanglan nan egsakto na pinsada.

---

The Appearance to Mary Magdalene

Corinthians 5:14-17
Psalm 63

John 20:1-2, 11-18

An pag-tagik nan kanhi na mga estorya an isa ka paagi na mahisugilon an mga impormasyon gikan sa katiguyangan nadto sa mga kabataan. An mga estorya amo’y magkonekta nan mga henerasyon ugsa na bisan bata pa kita, nahibayp kita nan mga nahitabo sa mga una pa na panahon.

Kada henerasyon jao’y pinaka-importante na okasyon o sitwasyon na amo’y maka-konekta sa mga tawo nan jaon na mga adlawa.

Ugsa na dinhi sa ato Ebanghelyo, ma-imajin nato na si Mary Magdalene arang gajud an kaguol kay nawaya man si Jesus sa lugar kon diin Sija ilubong. Pero nan tag-sangpit nan Ginoo an ija ngayan, listo karajaw sija naka-kilaya nan boses nan ija agalon.

Kon sangpiton kaha ni Jesus an ato ngayan na dili nato Sija hikit-an, hikilay-an kaha nato an ato Lord?

---

The Purpose of the Parables

Exodus 19:1-2, 9-11, 16-20b
Daniel 3

Matthew 13:10-17

Kon hikit-an lamang nato an halayum sanan halajo na kamatuoran nan mga pulong, kon pamatian lamang nato an waya isulti, nagtuo ako na ato ra hibay-an an tubag sa mga pangutana nato sanan an kapuslanan nan ato mga kagustuhan, hibay-an ra nato.

Kon dako na pagka-bungat nan mga mata nato sa kasing-kasing sanan an mga talinga nato mamati sa huna-huna, mas hisab’tan pa gajud nato karajaw an ato tagpamatian.

May taglaong na tinood kuno na tawo an isa ka tawo kon an ija mga mata may kasing-kasing, kon an ija talinga may pagbati, sanan an ija pagbati may talinga sab; kon an mga alima may pagbati sanan an ija kalooy may mga alima sab.

Amo na kon an ato kinabuhi may Diyos, an ato Diyos isab naghuya sa ato pagkatawo, tinood gajud kita na buhi karajaw.

---

The Parable of the Sower

Exodus 16:1-5, 9-15
Psalm 78

Matthew 13:1-9

Para sa mga tagapamati sa mga pulong nan Diyos an tujo sanan an tumbok nan pasumbingay kuman ni Jesus. Duro an mga pamaagi nan pagdawat nan pulong nan Diyos ugsa lain-lain sab an resulta na bunga nan mga pulong.

May mga tawo na serado an huna-huna, dili katudluan sanan buta an mata, dili makadawat nan mga pulong; may mga tawo na hamabaw ra an pagka-pamati, waya na’y pag-pinsar sanan pag-analisar; may mga tawo sab na mamati nan pulong pero duro an mga tag-huna-huna na iban na mga butang, arang ka besi ugsa na dili na maka-pinsada nan halayum kay mahamok an suyod nan utok, seguro, maluja sab an lawas; an katapusan na klase nan tagapamati nan pulong nan Diyos an mga tawo na abri sanan tin-aw an huna-huna sanan an kasing-kasing, may luna na makadungog sanan maka-kat-on, waya’y hambog sanan dili kon besi para maka-kat-on.

Sa ulihi na klase nan tagapamati nan pulong nan Diyos, amo ini sila an maka-dawat nan duro na mga grasya gikan Dija kay sila man an andam na mosabot sanan makapa-tuhop sa ila mga kasing-kasing nan mga pulong, jao’y kusog na maghuya nan kinabuhi na nagasunod sa gusto nan Diyos.

Nobati ba kita nan gutom o nangandoy ba kita n makadawat nan mga pulong nan Diyos?

---

The True Family of Jesus

Exodus 14:21—15:1
Exodus 15

Matthew 12:46-50

Tagpakita ni Jesus dinhi sa ato Ebanghelyo kuman an isa ka pamaagi nan kinabuhi sa pamilya. Sa pagdawat sanan pagmahal nato sa ato pamilya, apil na an ato mga lumon, amo sab ini an ato taghimo para sa Diyos sanan an sa ato pakighi-usa kan Jesus.

May mga panahon na usahay pugngan kita nan mga miyembro nan ato pamilya para dili kita makadangat nan mga peligro sanan mga masakit na eksperiyensiya kay gusto ra man gajud nila na protektahan kita nila – pagpakita nan ila pagmahal dato karajaw. An resulta, usahay mai-ubos kita dila kay imbes na gusto nato, dili nato mahimo kay jaon sila na mopugong.

An isa ka positibo na sitwasyon nan pamilya, an jaon ad-o’y tag-laong na freedom, kalayaan sa tagalog, sanan respeto sa kada miyembro nan pamilya.

---

The Demand for a Sign

Exodus 14:5-18
Exodus 15

Matthew 12:38-42

Madali ra kita motuo dajon na egsakto an ato desisyon o jaon kita sa tinood na dayan sa ato pagdesisyon kay sa tan-aw nato, may kompirmasyon man na signus o kamatuoran na ato hinkit-an gikan sa Diyos.

Pero, usahay sa ato persepsiyon, an signus amo na an mahitabo o amo na an indangatan – an signus amo ra’y magatudlo sa mahitabo, dili gajud kon amo na’y nahitabo.

Sa ato Ebanghelyo kuman, an mga demonyo sanan mayaot na henerasyon ra kuno, laong ni Jesus, an mga naghanap nan signus – sila ra kay waya ma’y ila pagsalig sanan pagtuo sa Diyos.

An sentro nan tanan na mga diskusyon dinhi, an gugma, pagmahal. An pagmahal, kinahanglan kinasing-kasing gajud na pagpili, pinili na personal – gikan sa kina-ilayuman nan pagkatawo. Misteryoso an Diyos ugsa na ato sab ipadayag an ato gugma Dija pinaagi sa ato misteryoso na paghigugma sab Dija.

---

The Parable of the Weeds Among the Wheat

Wisdom 12:13, 16-19
Psalm 86
Romans 8:26-27

Matthew 13:24-43 (or 13:24-30)

Sa homiliya kaina buntag ni Monsignor Terry Iral, isa ka Surigaonon na pari diri sa St. Peter Parish Church sa Quezon City, tagsugdan ini nija nan isa ka pangutana: “May mga panahon ba sa ijo kinabuhi na naka-pangaliya kamo sa Diyos na unta kuhaon na ni Lord an tanan mga dautan na mga tawo sa kalibutan?” Of course, tinagalog an ija sermon!

Para sa ato, masabad inin mga tawo na mga manunuyay, mga bata-bata ni Satanas, waya’y mahimo kon dili mandani para makasaya sab kita sa Diyos. Pero an laong ni Monsi (dagnay namo ini kan Monsignor) na an mga makasasaya, permi ra sila nato kaiban sa ato mga katilingban. Sila amo’y makapa-hugot nan ato mga kombiksiyon na permi kita magbuotan sa panan-aw nan Ginoo, na maglikay kita na makasaya sa ato Diyos kay para mahilangit kita.

Paningkamutan rakan nato na ato sila mapa-balhin nan ila kampo gikan sa pagka-makasasaya nadto sa pagka-maligdong sanan magatuo sa Diyos sanan sa pagpasaylo Nija sa ato mga kasay-anan.

----

The Chosen Servant

Exodus 12:37-42
Psalm 136

Matthew 12:14-21

Usahay, may mga solusyon kita na ipadapat sa ato mga problema na temporaryo ra pero dili gajud kon amo’y tinood na solusyon. Tinood, makita nato na inka-solusyunan nato an problema, pero sa kapulihay, mobalik ra gihapon an problema kay temporaryo ra man an ato tagpadapat na solusyon.

Si Jesus amo’y magdaya nan pinaka-ultima na solusyon sa ato mga problema. Sija an magdaya nan hustisya sa tanan, an pinaka-solusyon o an pinakahinungdan nan kadaugan nan kinabuhi na ato taghuyatan, an kinabuhi na waya’y katapusan, kaiban an Diyos didto sa kalangitan.

---

Picking Grain on the Sabbath

Exodus 11:10—12:14
Psalm 116

Matthew 12:1-8

Kalooy, dili ko sakripisyo an Ija gusto. Kon maluloy-on an isa ka tawo, malumo karajaw an ija kasing-kasing, dili kon matig-a. An ekspresyon nan paghigugma, an pagpakita nan pagmahal jaon permi dija.

Amo seguro na an gusto ni Jesus, kalooy kay isa man ini ka gawi na gikan gajud sa kasing-kasing. Amo na an importante dinhi kon tag-uno nato pagpadayag nan ato pakiglambingit, panginlabot sanan pagkasuod sa ato isigkatawo na mahi-demonstrar nato an ato pagmahal.

Kinahanglan an mangibabaw sa ato mga kinabuhi an ato pagpakita nan paghigugma sa ato isigkatawo.

---

The Gentle Mastery of Christ

Exodus 3:13-20
Psalm 105

Matthew 11:28-30

Waya’y makatuo na traynta'y tres anyos na ako nagtrabaho sa gobyerno – an pangutana dajon dako kon uno man na naka-abot man ako nan ini ka dugay sa trabaho na waya’y balhin-balhin sanan waya bidli-e na amo ra permi na lugar nan tagtrabahu-an.

Sa ako kaugalingon, an rason seguro nako kay kada adlaw na mosuyod ako sa trabaho nako, permi man tuho nako huna-hunaon na inspirado ako kay marajaw man an ako suweldo na pagadawaton kada katapusan nan buyan sanan dili man karajaw kon mabug-at an ako trabaho sa opisina.

An mga malisod sanan mabug-at na trabaho amoy dili kagustuhan nan tawo – masajon sanan magaan ra gajod an ato permi hanapon na mga buluhaton.

Amo seguro na dinhi sa ato Ebanghelyo kuman, tag-gajang ni Jesus sa tawo an masajon sanan magaan na yugo na buot ipasabot na an sagubangon nan tawo na mga problema madali ra hanapan nan solusyon sanan jaon Sija permi na andam mohatag nan tabang sanan solusyon.

---

Heavenly Things Revealed to Children

Exequiel 3:1-6, 9-12
Psalm 103

Matthew 11:25-27

Kon ato obserbahan an mga bata, makita nato sila na waya’y ila mga problema sanan waya’y mga plano sa ila mga kinabuhi. Duwa ra sanan estoryahanay na sila ra an makasanot nan ila tag-estoryahan. Madali ra sila mosunod bisan hain sila dad-a, madali ra sila mamanipula.

Amo ini an kalidad sanan klase nan tawo na gusto pakitaan na Diyos na Ama nan Ija kamatuoran – an mga gagmay na mga bata, mga bata sa isip, sa huna-huna, puro sa panan-aw, abri an kasing-kasing para modawat nan mga sugo Nija.

Ugsa na kita ‘sab na mga nagtuo sa Diyos, mga Kristiyanos, kinahanglan na abri sab an ato mga kasing-kasing para makasuyod an Espiritu nan Diyos sa ato pagkatawo para kita magiyahan Nija.

---

Upbraids to Unrepentant Towns

Exequiel 2:1-15a
Psalm 69

Matthew 11:20-24

Seguro juhot na karajaw si Jesus sa iban na mga lungsod na dili gajud motuo Dija bisan arang na ka duro an Ija taghimo na mga milagro para dila. Tagpasidan-an sila ni Jesus na kon dili maghinolsul, mayaot an ila dangatan sa sunod na mga panahon. Naglingu-lingo seguro si Jesus nan jadto na tungora sanan nangutana kon kun-o man kaha ini sila makakat-on Dija.

Amo ini kita hangtud kuman, waya pa gihapon kita maka-kat-on. Duro pa gihapon an ato mga binuhatan na dili gusto nan Diyos.

Nahibayo kita na kinahanglan ampingan gajud nato an ato mga lawas kay amo man ini an templo nan Espitu Santo, pero abusar pa gihapon kita – segarilyo, alak, droga, sanan mga bisyo. Duro pa karajaw an ato mga kasay-anan sa Diyos na kinahanglan nato hinolsulan.

Paningkamutan rakan nato na mapasu-od kita sa Diyos pinaagi sa ato permi na pakig-estorya Dija, pangaliya, pagpasalamat sa mga grasya na ato tagpahimuslan kada adlaw sanan pakig-relasyon nan suod Dija.

---

Jesus: A Cause of Division

Exequiel 1:8-14, 22
Psalm 124

Matthew 10:34—11:1

Repleksiyon

Sa sugo ni Jesus sa Ija mga disipulo, an laong Nija na an daya Nija dinhi sa kalibutan dili kon kalinaw kundili kasamok. An Ija taghatag na ehemplo dinhi na bisan sa isa ka bayay, kasamok amo’y mahitabo kay magka-away-away man an mga miyembro nan pamilya. Pero buot Nija ipasabot na kon sin-o an magmahal sa tatay sanan sa nanay labaw pa Dija, dili angajan na mahimo na disipulo Nija.

An mensahe ni Jesus dinhi sa Ebanghelyo na kinahanglan an pinaka-importante an ato relasyon sa ato Ama sa Langit, an ato Diyos, na kinahanglan amo gajo’y pinaka-prayoridad sa ato mga kinabuhi. An Diyos an permi pinaka-mataas sa lebel nan ato mga mahal sa kinabuhi.

Kon pinaka-mahal nato sija, kinahanglan sab na mosunod kita sa tanan na mga gusto ipahimo Nija dato.

---

The Parable of the Sower

Isaiah 55:10-11

Psalm 65
Romans 8:18-23

Matthew 13:1-23

Repleksiyon:

Tuyo ka elemento an nakapukos dinhi sa ato Ebanghelyo – an nagtanum o an Diyos mismo; an binhi o an mga pulong nan Diyos, sanan; an tagtamnan, an lupa na buot ipasabot, kita ini, an mga tawo na mamati sa mga pulong nan Diyos.

Pero an gusto ko hatagan dinhi nan importansiya sa ako repleksiyon, an tagtamnan, an tawo na modawat nan mga pulong nan Diyos. Upat ka klase nan tawo dinhi an taghisgutan: una, an dayan na dili gajud makatubo an binhi kay tamagtuka man nan mga langgam; ikaduha, an sa batuhon na makatubo man gani pero kon kasughan, mangamatay ra dajon kay hababaw ra man an tagtubuan; sa ikatuyo, an nahi-iban sa mga dugion na mga tanum, nangamatay ra sab kay tagdaug sanan tamagpitlok man nan mga dugion na tanum; sanan an ika-upat, an mga nahitanum sa marajaw sanan matambok na lupa, mamunga gajud ini nan duro karajaw.

Demudo, kita na mga mudawat nan mga pulong nan Diyos, kinahanglan ato gajud palambuon an ato hintun-an na mga leksiyon gikan Dija para nato mahipaambit sab sa ato mga mahal sa kinabuhi, mga kilaya, sanan sa iban pa na mga tawo na modawat sab nan mga pulong nan Diyos.

Ipangaliya nato sa Diyos na tanan Nija na mga pulong motuhop sa ato mga kasing-kasing sanan ato magamit o mahi-apply sa ato mga kinabuhi an ato hindtun-an gikan Dija.

---

Courage and Persecution

Genesis 49:29-32; 50:15-26a
Psalm 105

Matthew 10:24-33

Repleksiyon:

Uno kaha’y buot ipasabot ni Jesus sa Ija taglaong na iproklama an tanan hidunggan na hinagas? Yano ra karajaw na an Ija gusto ipasabot na an kamatuoran kinahanglan na mahisangyaw. An kamatuoran may kaugalingan na kinabuhi ugsa na dili mahimo na itago lamang o ilubong lamang ini. Dili mapatay an kamatuoran hangtud sa kahangturan.

Ugsa na sa ato mga kinabuhi, kinahanglan gajud na permi kamatuoran an ato iproklama - kay kamatuoran man an Diyos, ato gajud Sija permi iproklamar sa katawhan na an Ija pagmahal sa tawo, permanente na dili kita magpanuko na modangup Dija sa kada gutlo nan ato mga kinabuhi.

----

Coming Persecutions

Genesis 46:1-7, 28-30
Psalm 37

Matthew 10:16-23

Repleksiyon

Tagpasindan-an na daan ni Jesus an Ija mga apostoles na magsagubang sila nan mga pag-antos sanan pagbud-hi sa mga kamot nan ila mga kontra. Pero tagpasaligan sila Nija na dili lamang sila magkaguol kon unhon nila pagsulti sanan uno’y ila isulti kon moatubang na sila sa mga kontra kay tanbangan ra man sila Nija.

Amo sab ini an pasalig ni Jesus dato kuman kon uno’y ato isulti kay kinahanglan lamang na nahibayo kita sa ato kasing-kasing na an Espiritu nan Diyos na naghuya dato amo’y magderihir sanan mag-giya sa tanan nato mga desisyon, magpakusog nan ato mga kabubut-on kon kinahanglan nato nan kaisog sanan maghatag nan gahum sa mga tawo na naghanap nan kamatuoran sanan hustisya.

Ipangaliya lamang nato sa Diyos na hatagan kita Nija nan hugot na pagtuo na Ija lamang tagpahimo dato an Ija gusto. Amo ini an tagalong na ‘let go and let God.’

--

The Mission of the Twelve

Genesis 44:18-21, 23b-29; 45:1-5
Psalm 105

Matthew 10:7-15

Repleksiyon

An sugo ni Jesus sa mga disipulo na isangyaw ang marajaw na balita na an gingharian nan Diyos umaabot na sanan an pagpanambay nan mga maysakit amo’y taghatagan dinhi nan importansiya.

Dinhi, libre na nadawat nan mga disipulo an gahum na makatambay nan mga sakit sanan makasangyaw na marajaw na balita gikan sa Ginoo ugsa na tagtugunan sila ni Jesus na ipa-ambit nila an nadawat nila na mga gasa gikan Dija para nadto sa katawhan. Kinahanglan ipasa nila ini na mga gasa na dili sila magpaabot nan uno rakan na pabor o mga kabajaran gikan sa bisan kanin-o.

Ato makita dinhi na an kinahanglan baja gajud para sa tawo sa pagdawat nija nan trabaho gikan sanan para sa Ginoo, waya’y panuko sanan dili maghuna-huna nan regalo agi’g bajad sa ija binuhatan.

Kita sab, sa ato kanya-kanya na mga pangalimbasog na maka-silbe sa Diyos, dili lamang nato pagpaabuton an uno rakan na mga pabor gikan Dija kay nahibayo naman Sija nan ato mga kinahanglan sa ato mga ija-ija na kinabuhi.

---

The Commissioning of the Twelve

Genesis 41:55-57; 42:5-7a, 17-24a
Psalm 33

Matthew 10:1-7

Repleksiyon

Taghatagan ni Jesus nan gahum an dose Nija ka mga apostoles, gahum na makapalayas nan mga masabad na espiritu sanan makatambay nan klase-klase na mga sakit. Pero an pinaka-importante na misyon nan mga apostoles: an pagsangyaw nan marajaw na balita na an gingharian nan langit umaabot na.

Inpili ni Jesus an dose ka ordinaryo ra na mga tawo, mga mangingisda, mga wayay ensakto na edukasyon, sanan mga makasasaya pa gajud. Pero uno man na amo ma’y Ija inpili sila? Hingkit-an seguro Nija daan an mga kasing-kasing nan ini na mga ordinary na mga tawo na makahimo nan katingayahan sanan ekstra-ordinaryo na trabaho na jaon tag-laong na “ordinary people who can do extra-ordinary tasks.”

Sa labing-tinuod, kita sab na mga Kristianos, may mga misyon sab kita para sa ato Ginoo. Seguro sa ginagmay nato na himoon para sa Diyos, malipay na sab seguro si Jesus dato bisan ordinary ra na mga butang an ato mahimo. Ugsa na pangalimbasugan gajud nato na sa ato ginagmay na paningkamot, mahisangyaw sab nato an marajaw na balita nan gingharian nan Diyos didto sa langit.

--

The Compassion of Jesus

Genesis 32:23-33
Psalm 17

Matthew 9:32-38

Repleksiyon

Nan hingkit-an ni Jesus an pundok nan mga tawo, in-abot Sija nan kalooy dila. Dinhi, ato makita an halayum na pagsabot nan Ginoo sa mga tawo na mosuod Dija para mamati nan Ija mga pagtudlo.

Amo ini an reaksiyon si Jesus pagkatapos Nija magtudlo sa mga tawo sanan pagtambay Nija nan mga maysakit. Pero an gusto nan Ginoo seguro dinhi, sa ako pagsabot, na magbaton lamang gajud an tawo nan paglaum sa kinabuhi, paglaum sa Diyos, dili lamang gajud magkahuyop!

Ugsa na an kinahanglan seguro nato himoon, sa ato mga kasing-kasing, permi gajud kita may paglaum sa ato mga kinabuhi kay an Diyos, Diyos man Sija nan paghigugma sanan paglaum.

---

Your Faith Has Saved You

Genesis 28:10-22
Psalm 91:1-4, 14-15

Matthew 9:18-26

Repleksiyon

Dinhi sa ato Ebanghelyo kuman, tuyo dajon ka milagro na nahitabo an ato hingkit-an. Pero kon tan-awon nato, bagan duha ra kay duha ra man gajud an klaro: an pagkadajaw nan dose anyos na sakit nan babaje sana an pagkabuhi nan bata na patay na.

An ika-tuyo na milagro na gusto ko hatagan nan importansiya, an pagkabalhin nan impresyon nan mga tawo na nagbordon sa patay na bata. Sa una na higayon, tagbiay-buay nila si Jesus kay imposible man kuno na mabuhi Nija an bata sanan in-bordonan na man ini. Pero nan nahimo man imosible ugsa na nahibuyong an tanan na naka-kita sanan naka-testigos sa nahitabo.

An pagkabalhin nan panan-aw nan mga tawo kan Jesus gikan sa ila pagbiay-biay hangtud sa nagtuo na sila na gamhanon Sija sanan wayay iposible sa Diyos amo’y pinaka-dako na milagro na nahitabo, ugsa na nokanap an balita sa tibook rehiyon sa ila lugar mahitungod sa nahitabo.

Ugsa na para dato, kinahanglan na hugot lamang gajud an ato pagtuo sa ato Ginoo kay Sija ra man gajud an tag-ija sanan an nagmugna nan tanan na mga butang sa kalibutan.

--