The Healing of a Paralytic

Genesis 22:1b-19
Psalm 115

Matthew 9:1-8

Repleksiyon

An mayaot na mga huna-huna nan mga Pareseo, inhibay-an dajon ni Jesus kay mahibayo man Sija mobasa nan mga huna-huna. Segurado sab na nabasa Nija nan jadto na tungora an huna-huna nan paralitiko na tagpa-tambajan. Seguro, an mga saya nan paralitiko na taghuom ra nija sa ija kasing-kasing, inhibay-an ni Jesus sab.

Demudo kita sab, nahibayo kita na an tanan nato na mga saya batok sa Diyos inhibay-an ni Jesus. Ugsa na marajaw seguro kon ato na daan ipangajo nan pasaylo kan Jesus kay Diyos man Sija na malumo an kasing-kasing, sanan, kinahanglan pagkatapos nato ipangajo nan pasaylo, hinulsulan na nato an ato mga kasay-anan, despuwes paningkamutan na dili na mautro pa paghimo an mga saya na ato nahimo.

Ipangaliya nato na giyahan kita nan Diyos pinaagi sa Ija Espirtu Santo na makalikay kita sa mga tentasyon sanan sa mga kasay-anan na makapa-guol Dija kay mahal man kita Nija karajaw, dili man Nija gusto na mahibalhog kita sa waya'y katapusan na pag-antos sa empiyerno.

-

Peter's Confession about Jesus

Acts 12:1-10
Psalm 34
2 Timothy 4:6-8, 17-18

Matthew 16:13-19

Repleksiyon

An pangutana ni Jesus sa mga disiplulo kon sin-o Sija sa tan-aw nan mga tawo, sa ako pangag-pas, dili gajud kon gusto Nija hibay-an kon hinkilay-an gajud Sija nan personal sa Ija ngayan sanan kon sin-o’y mga ginikanan Nija kondili gusto Nija hibay-an kon uno’y tinood na impresyon nan mga tawo mahitungod Dija.

An ikaduha na pangutana ni Jesus dila, kon sin-o Sija para sa mga disipulo. Personal na gajud ini pangutana - kon kilaya ba gajud nila Sija, kon hinsabtan ba nila Sija sanan kon puwede ba sila makig-sandurot Dija hangtud sa katapusan.

Sa ako personal sab na kinabuhi na Espiritwal, inbaling nako an pangutana para dako, kon kilaya ba gajud nako si Jesus sa personal na paagi, kon may suod ba ako na relasyon Dija sanan kon tag-dawat ba gajud ako Nija isip isa ka manunubos sa ako mga kasay-anan, isip isa ka higaya sanan igsoon.

Ugsa na permi gajud nako ini ibutang sa ako boot na mga pangutana kay pag-abot nan panahon na moatubang na ako Dija, mangutana man gajud Sija dako kon nagkakilaya kami nan dinhi pa ako sa kalibutan.

-

The Calming of the Storm at Sea

Genesis 19:15-29
Psalm 26

Matthew 8:23-27

Repleksiyon

Mahadlukon sanan talawan ako nan bata pa ako didto sa amo lugar. Madugyon sa Habungan kon moabot na an marduyom kay waya pa ma’y elektrik nan jadto na panahona. Pagka-kahuyom na, dili na ako magpa-langan-langan pa sa gawas nan bayay para dili ako hiab’tan nan madugyom sa karsada.

Pero an kahadlok, jaon ra baja sa huna-huna. Amo ini an ako hingkat-onan nan nodako-dako na ako segun sa mga eksperiyensiya na ako ingkahibalag.

Sa ato Ebanghelyo kuman, an kahadlok nan mga disipulo sa ila tagsagubang na bagjo sa lawod amo’y nag-estorbo dila, hindugangan pa nan aktuwasyon ni Jesus na natuyog lamang na bagan waya magpakabana.

Pagkatapos nan sitwasyon, nabag-o an ila panan-aw – gikan sa kahadlok, nabalhin sila sa pagka-hibuyong na uno man inin ila kaiban na gamhanan man baja na bisan an bagjo sanan an danaw motuo man Ija sugo.

Amo na sa ato mga kinabuhi, dili lamang gajud kita magkahuyop, magkabiro sanan magkaguol kay an ato Diyos permanente man na jaon dato para madali nato Sija masangpit.

The Would-be Followers of Jesus

Genesis 18:16-33

Psalm 103

Matthew 8:18-22

Repleksiyon

“Dong, igkuwarta raw anay ako nan asin.” “Taym pa anay.” Arang ra kadali ako makatubag nan “taym pa anay” kan Nanay nan bata pa ako kada suguon ako pagpapalit nan asin.

Amo sab ini na nahitabo dato sa sugo ni Jesus na isangyaw an marajaw na balita sa mga tawo. Dili dajon kita molihok kay duro pa an ato mga himuonon sa ato mga kinabuhi – maghanap nan kuwarta para i-tuwisyon nan mga bata, para sa pagkaon, sa mga baro sanan bisan uno rakan.

An gusto nan Ginoo na ora mismo gajud an ato tubag sa Ija sugo. Pero an tawo, duro pa an mga pasumangil, mga rason na dili maka-tubag dajon sa tawag nan Diyos.

Uno pa ma’y ato huyatan? Na matunaw na an kalibutan adeser pa kita motubag sanan mohimo sa Ija mga sugo?

Amo’y ato ini pamalandungan sa ato mga kinabuhi kada adlaw, na molambo an ato Kristiyano na kinabuhi para may kusog kita na ato mahisangyaw an marajaw na balita nan pagkasalbar.

The Healing of a Centurion’s Servant

Genesis 18:1-15

Luke 1

Matthew 8:5-17

Repleksiyon

Hala, panaw na kay marajaw na an hilanat nan imo suluguon sa ijo bayay.

Long distance na pagtambay amo’y nahitabo sa suluguon nan centurion. Taghimo ini ni Hesus kay hinkit-an man Nija ang hugot na pagtuo nan centurion sanan an nakadajaw pa, hinkit-an sab Nija an pagmahal nan isa ka opisyal sa ija suluguon.

Amo na an laong nan Ginoo, kay nagatuo man ‘kaw, mahimo an imo gusto para sa imo suluguon.

Ugsa, kinahanglan ipadayag sab gajud nato an ato gugma besan sin-o na tawo hilabina an mga gagmay sanan ubos ran a tawo.

Give an early bonus to your household help.

The Birth of John

Isiah 49:1-6

Psalm 139

Acts 13:22-26

Luke 1:57-66, 80

Repleksiyon

Nan elementary pa ako, eksayted ako kon Hunyo na kay hapit na man iselebrar an San Juan – entero adlaw, adto sa danaw, ligo-ligo, doro an pagkaon, bibo karajaw an danaw.

Waya’y ako pagpakabana kon uno’y buot ipasabot nan pagselebrar nan ini na okasyon, basta an hidumduman ra nako na arang ka bibo an Habungan kay duro man an mokadto na mga taga-iban na lugar para mangaligo sa danaw.

Kuman na medyo may edad na ako sanan nag-entra-entra na sa mga akitbidades sa Simbahan, nahibayo na ako nan papel ni Juan sa ato tinuohan.

Espesyal baja na gasa si Juan nan Diyos sa kalibutan kay sija man an nagpahibayo sa mga tawo na moabot na an Ginoo amo na kinahanglan ipreparar nija sanan nato an dayan na agihan nan Ginoo, pagkatapos, ija pa gajud tag-bautismohan si Hesus sa Jordan.

Ugsa na kinahanglan pasalamatan gajud nato si Juan kay ija man sab tag-gasa sa Diyos an ija kinabuhi pinaagi sa ija pagpakamartir – tagpunggutan sija nan ija uyo nan mga tawo Herodes.

The True Disciple

Genesis16:1-12, 15-16
Psalm 106

Matthew 7:21-29

Repleksiyon

Sa Kristiyano na kinabuhi nan tawo, an tinuohan dili kon amo’y pinaka-importante na basehan para kita mahilangit. Kinahanglan ipakita nato an resulta nan ato tinuohan pinaagi sa mga binuhatanan nato dinhi sa kalibutan. Dili lamang nato isulti na nagtuo kita sa Diyos kondili, ipakita gajud nato an ato pagtuo pinaagi sa pagpadayag nan ato gugma, gugma sa ato isig-katawo, sa tanan tawo, kay amo man ini an ato ekspresyon nan ato gugma sa ato Mahal na Diyos.

Kinahanglan dili gajud nato itago an ato gugma kay an ekspresyon nan pagmahal kihanglan hikit-an man gajud, mahi-demonstrar. An buot nako ipasabot na ipadayag nato ini pinaagi sa aksiyon sanan ipakita nato ini sa ato pag-amuma.

Amo na pangalimbasugan gajud nato na mahipadayag nato an ato paghigugma sa ato isig-katawo para mahipakita nato sa ato Mahal na Diyos an ato pagmahal Dija.

The Golden Rule

Genesis13:2, 5-18
Psalm 15

Matthew 7:6, 12-14

Repleksiyon

Ini’y isa ka pamilyar na estorya na usahay pabalik-balik na na itagik dato bisan diin rakan.

Kada adlaw kuno, paga-obserbahan nan sais anyos na bata an ija tatay magpakaon sa ija lolo. Nahibuyong an bata kon uno man na an kan-anan nan ija lolo na butangan nan ija tatay nan pagkaon, luho man nan nijog na bagan waya pa’y gani hugas-hugas na kon buot huna-hunaon, mga mahalon man an ila gamit na mga plato kon sila an mangaon sa ila lamesa. Pero an lolo nija, magakaon nan ija pagkaon sa luho, sa kuwarto ra nija.

Adlaw-adlaw, buntag udto hapon, amo’y permi hiobserbahan nan bata an ija tatay na paga-himoon sa ija lolo.

Isa ka adlaw, hinkit-an nan tatay an bata na masan-kagis-kagis nan luho nan nijog – tagpa-limpiyo sanan tagpa-kinlaw gajud nan bata an ija kinagisan na luho.

Nangutana an tatay kon uno’y tagka-besihan nan bata. “Uno man ton imo taghimo, Long?” “Naghimo ako nan kan-anan na luho, ‘Tay!” tubag nan bata.

“Kaguwapo nan iton! Para ba iton kan Bantay, an ato iro?” “Dili, ‘Tay, tagpakinlaw gajud ini nako sanan tagpaguwapo kay amo’y ini imo gamiton sab pagka-mayaas na nimo.”

Do unto others what you want others do unto you.

Judging Others

Genesis 12:1-9
Psalm 33

Matthew 7:1-5

Moabot man gajud an kamatajon nan tawo, uno kaha’y ihusga nan Diyos dako kon makig-atubang na na ako Dija? Ibalhog kaha ako sa impiyerno o ibutang Nija ako sa Ija kaharian sa langit na wayay katapusan an kalipay kaiban an mga santo sanan mga anghel.

Paghusga – amo’y ini ato segurado na atubangan sa katapusan nan ato mga kinabuhi.

Marajaw seguro kon seguraduhon sab nato na pag-abot nan panahon nan paghusga nan Diyos, paborable gajud an Ija ihatag na husga sa ato. Para mahimo nato ini, seguro, ihunong na nato an paghusga sa ato isig-katawo para dili sab kita husgahan batok ra sab dato. Hikalimtan na nato an ato hingka-andan na manhusga nan mayaot sa iban na mga tawo.

Para mahino nato ini, pangaliya ra gajud sa Diyos an ato kadangpan para nato mahihunong sanan hikalimtan an ato gawi na manhusga sa ato isig-katawo, sa tabang ni Santa Maria Berhin, pinaagi kan Hesus iban an Espiritu Santo.

Memorize the prayer of St. Francis of Assisi: Lord, make me an instrument of your peace.

Dependence on God

2 Corinthians 12:1-10
Psalm 34

Matthew 6:24-34

Repleksiyon

Uno man na puno man permi an tawo nan kahuyop, kaguol, kabayaka sanan mga pagproblema nan para naj-an, para silom, para sa damyag sanan para sa sunod na mga adlaw? “Ajaw magkaguol sa imo kaugmaon; an silom amo ra’y mopahigajon nan ija kaugalingon,” laong pa nan ato Ginoo.

Kon buot huna-hunaon, an Diyos na nagmugna dato tanan dinhi sa kalibutan, isa ka mapagmahal sanan gamhanon karajaw na Diyos. Segurado man gajud kita na ihatag Nija ang tanan nato na kinahanglanon sa ato mga kinabuhi. Sanan kon problemahon nato tanan: an ato mga anak, ato pagkatiguyang, mga sakit-sakit, bisan an panahon sanan an tempo nan kalibutan, hasta na an gobyerno, an ato mga kaugmaon, jaon ba’y ato mahihatag na solusyon unabes dajon?

Amo balitaw na an leksiyon ni Hesus para dato sa Ebanghelyo kuman, dili lamang gajud kita magkahuyop kay parehas nan mga langgam sa langit na dili man gani sila mahibayo magtanom sanan mag-ani, makakaon man gihapon sila kay pinakaon man sila nan Diyos. Ugsa na para dato na mga tawo, unahon lamang gajud nato an paghanap nan ginharian nan Diyos, an TANAN na mga butang idugang Nija dato.

“Lord Jesus, free me from needless worries and help me to put my trust in you. May my first and only concern be for your glory and your kingdom of peace and righteousness. Help me to live each day and moment with trust and gratitude for your providential care for me.”

Treasure in Heaven

2 Corinthians 11:18, 21-30
Psalm 34

Matthew 6:19-23

Repleksiyon

Inday uno nan an bata pa ako, madali ra man hibay-an ni anhin Tatay Jose kon namakak ako? Aja ra man motan-aw sija sa ako mga mata, mahibayo na man dajon sija kon waya ako magsulti nan tinood. Hilabina kon mangawat ako nan sinsilyo sa bulsa nan ija sinab-it na karsones, dali ra karajaw an imbestigasyon.

Seguro, isa ra ka tan-aw ni Tatay sa ako mga mata, hikit-an na dajon nija an kamatuoran kay mabasa man nija an tinood na tag-sulti nan ako mga mata sanan an ato mga mata, dili man mahibayo kuno mamakak.

Tinood gajud na an suyod nan kasing-kasing mahipakita sa ekspresyon nan mata. Ugsa na matawag nato na tinood an isa ka tawo kon may kasing-kasing ang ija mga mata despuwes may mga mata sab an ija kasing-kasing.

Amo na kinahanglan pangalimbasugan gajud nato, sa tabang nan Espritu Santo, na tinood sanan kamatuoran an ato ipakita sa ato isig-katawo pinaagi sa ato pangaliya sa Diyos kada adlaw.

Be appreciative today.

The Lord’s Prayer

2 Corinthians 11:1-11
Psalm 111

Matthew 6:7-15

Repleksiyon

Un’hon man nato pagpangadje? Una, aber kon dili kita kon inspirado na mangadje, aber kon maluja sanan matuyog, himoon lamang gajud nato an pagpangdje.

Ikaduha, ajaw pagpahisulti nan waya’y hinungdan na mga panultihon, laong pa nan Ginoo. Pamatian nato an mga hagas nan Diyos dato kay mas marajaw pa na mas mahamok an pagpamati nato kaysa sa pagsulti. Pamatian lamang gajud nato an Diyos sa ato mga kasing-kasing kay segurado na makadungog kita nan Ija mga pulong para dato.

Ikatuyo, kinahanglan malipay kita kay nahibayo na daan an Diyos ato mga kinahanglan bisan dili pa nato isulti Dija an ato mga gusto. Dili na kinahanglan na mangajo pa kita Dija. An himoon rakan nato, magpasalamat na rakan daan kita Dija sa Ija mga ihatag na grasya dato, tapos, mangajo na kita nan pasaylo sa nahimo nato na mga kasay-anan batok Dija. Segurado na Ija gajud hatagan nan grasya an ato mga tangadje.

Amo na kinahanglan malipajon gajud kita samtang nangadje kita kay dako man sab na kalipay nan Diyos na nakig-estorya kita Dija.

Almsgiving, Prayer, Fasting

2 Corinthians 9:6-11
Psalm 112

Matthew 6:1-6, 16-18

Repleksiyon

Pangadje, pagpuasa sanan paglimos – mga importante ini na binuhatan o trabaho sa kinabuhi nan isa ka Kristiyano.

Kon mangadje kita, magpuasa sanan maglimos, uno ma’y ato intensiyon sa ato mga kasing-kasing na taghimo man nato ini na mga butanga? Dakan dajegon kita nan iban na tawo sa ato pagpangadje, sa ato paghatag nan limos sanan sa ato pagpuasa? O para himayaon nato an Diyos sanan mahipadayag nato an ato kinasing-kasing na paghigugma o pagmahal Dija?

Amo na tagpasidan-an ni Hesus an Ija mga tinun-an na kon mangadje sila, himoon nila ini sa lugar na dili sila hikit-an nan mga tawo, dili kon parehas nan mga epokrito na magpakita sa karsada na nangadje. Kon maghatag nan limos, dili manhambog parehas nan mga epokrito sanan kon magpuasa, dili magpakita na an wayong waya’y areglar para dili hibay-an na nagpuasa.

Kinahanglan na an Diyos ra gajud an makadungog sa ato pangadje, mahibayo na nagpuasa kita sanan makakita na naghatag kita nan limos sa pobre.

An Diyos ra an kinahanglan na mahibayo nan tanan nato na taghimo kay Sija ra man an magbajad sanan mohatag dato nan grasya, waya na ma’y lain. Kay kon ipanhambog pa nato an ato mga binuhatan sa iban na mga tawo, bajad na tanan an ato mga hinimoan.

Paningkamutan gajud nato na maka-pangadje, makalimos sanan makapuasa kita para malipay dato an Diyos.

Learn the meaning of keeping a low profile.

The Greatest Love

2 Corinthians 8:1-9
Psalm 146

Matthew 5:43-48

Uno ma’y gajud buot ipasabot nan higugmaon nato an ato mga kaaway?

Sa ebangehlyo kuman, an buot seguro ipasabot ni Hesukristo para dato na tratohon nato an ato mga kaaway nan marajaw sanan tininuod na pagkatrato na kon mahimo, sobra pa sa ato mga amigo; ipangaliya nato sila na hatagan sila nan grasya nan Diyos; dajegon nato sila na amo ra nan dinajegan nato sa ato tinood na mga amigo.

Imposible! Klaro karajaw na imposible. Bagan dili gajud nato mahimo an inpahimo dato ni Hesus.

Pero, an saad nan Ginoo na waya’y imposible para Dija amo ra gaju’y ato basehan para mahimo nato an tanan na gusto Nija ipahimo para dato.

Demudo, grasya ra gajud nan Diyos an makapahimo dato nan imposible na mga butang. Ugsa na sa ato mga pangaliya adlaw-adlaw, pangajuon gajud nato sa Diyos na ipadaya Nija an Espiritu Santo pinaagi kan Hesus na bugtong Nija na Anak.

Hinaot unta na permi nato madawat an grasya nan Diyos kada gutlo nan ato mga kinabuhi.

Be grateful today. Say thank you and mean it.

Teaching about Retaliation

2 Corinthians 6:1-10
Psalm 98

Matthew 5:38-42 - Teaching about Retaliation

Repleksiyon

Uno man kaha na sukwahi man an tudlo ni Hesus para sa tawo kon an pakipag-sumpaki an ato estoryahan? Kinatalahan bagan para dako kon isumite nako an ako kaugalingon sa kontra ko – buot ipasabot na mosugot lamang ako na magpa-daog-daog. Bagan dili mahimo na magpaka-martir ako!

Pero amo man ini an gusto ni Hesus, na an tawo kinahanglan dili kon bayolente, mapa-ilubon, martir sanan ma-inantuson – dili kon buot ipasabot na mahina kita o waya’y baruganan, kondili, nagsunod lamang kita sa alternatibo na pamaagi na inhatag nan Ginoo.

Kon may gusto makig-kasamok, an marajaw na tubag: ipangaliya sija. Kon manlibak: pulos karajawan nan tawo an isulti para dija. Kon abusado na magresulta nan tungo: pasaylo an tambay. Kon mangawat: tabangi sija kay may importante na kinahanglan sija para sa ija kinabuhi.

Amo ini an taglaong nan Ginoo na an dayan na malisod, gamay ra’y motahak, gamay ra’y moagi: an tubag sa kaligutgot gugma sanan sa kajuhot, pakig-amigo – dinhi nato mahipa-abot an ato pag-amuma sa isig-katawo na amo’y gusto ni Hesus na himoon nato, grasya imbes na libak.

Pray for an enemy today.

The Commissioning of the Twelve

Acts 11:21b-26; 13:1-3
Psalm 98

Matthew 10:7-13

Repleksiyon

Nan panahon ni Hesus, an sako, panapaw na baro, sandalyas sanan baston, mga simbolo na andam na an tawo para mobiyahe. Pero nan pagsugo ni Kristo sa Ija mga apostoles para magsangyaw nan marajaw na balita, tagpugngan man Nija sila na magdaya nan ini na mga gamit. Kon buot huna-hunaon, manlangyaw sila sa iban na lugar na waya ma’y lamang daya na besti, kuwarta sanan mga gamit. Epektibo kaha an ila pagsangyaw nan mga balita bisan kuyang an ila mga galamiton?

An gusto baja ni Hesus na dili sila maghuna-huna nan mga kalibutanon na kinahanglanon para maka-pukos sila sa ila mga buluhaton na Ija tagsugo. Kinahanglan simple, magaan sanan waya’y kabag an ila kinabuhi para waya’y huna-hunaon na iban.

Sa ato kinabuhi kuman, amo ra gihapon an gusto isugo ni Hesus para dato. Pero para dato, an misyon, dili na gajud seguro kon kinahanglan na magbagtas pa kita para moabot sa lajo na lugar, makasangyaw ra lamang nan marajaw na balita, kon dili maghuya lamang kita nan simple na Kristiyano na kinabuhi, nagsunod sa mga maka-Diyos na panginabuhi para kita mahimo na sumabanan sa iban na mga tawo.

Ugsa, pangalimbasugan gajud nato na mahimo nato an ato misyon kan Hesus, sa tabang nan Espiritu Santo na Ija tagsaad na ipadaya dato para kita katabangan sa ato mga buluhaton para sa Diyos.